個案１：四人合資20萬開飛鏢場

李潤堅（ Thomas）是飛鏢發燒友，去年和三個由中學相識至今的老友合資20萬元，在新蒲崗某工廈租用千幾呎單位開辦飛鏢場，過吓老闆癮，「掟鏢係我哋幾個嘅共同嗜好，睇見其他鏢友喺工廈開鏢場，咪參考吓，自己開番間囉！」事前絕對不馬虎，做足準備，「如果喺市區開，鏢友寧願去酒吧。如果在工廈，又應該去邊區呢？觀塘？已經有好多間……」

新蒲崗工廈　呎租10元

走遍多個工業區，有次三更半夜去新蒲崗，看看這個工業區的晚上是否人影無隻，車也沒多架，卻出乎意料，「 OK喎！就算凌晨兩、三點，仲有人流，仲有車搭。」拍板揀新蒲崗，目標鎖定工業區的打工仔和附近幾個屋苑的街坊，例如譽﹒港灣。先睇街招，但總是信不過，於是搵經紀介紹，新舊工廈也去看，最終決定現在這個單位，「原因好簡單，管理好，24小時自由出入。單位四四正正，鍾意點擺都得。最好係交吉冇裝修，可以隨心所欲，鍾意點裝就點裝。當然，租金都好重要，10蚊一呎，接受到。」

從銷售飛鏢用品開始

鏢場攞正商業登記是銷售飛鏢用品， Thomas說：「客人買咗嘢都要試吓，於是提供飛鏢機，每舖象徵式收費5蚊，其他行家都係咁做，通常我哋叫呢度做『飛鏢道場』，一個練習掟鏢嘅地方。」開業大半年，如意算盤算是打得響，閒日天天維持十數人，周五至周日最旺場，平均五、六十人齊齊掟，有時還有客人包場搞生日派對、歡送會，經營情況頗樂觀。叫做下午3點開門，關門？從來沒有時間表，「對於我哋呢班鏢友嚟講，人人都有份正職，朝早返工，夜晚來掟鏢，一掟，有時真係唔知幾點，通頂實在好平常。有時玩到攰，攤開張梳化瞓兩、三粒鐘，第二朝又去開工。」